A tres hores y media de camín

ARTICULO GASTRONÓMICO EN LENGUA ASTURIANA PUBLICADO EN EL SEMANARIO "LES NOTICIES. Mayu 2010

Hai unes selmanes, garre unos “moscosos”, que nel llinguaxe funcionarial nun ye otro que unos “díes llibres d`esos que nun cuentes con ellos y tanto te presten”, y aprofité pa facer una escapadina con un bon collaciu fasta tierres d`Euskal Herria, más concretamente fasta tierres guipuzcuanes. El motivu de la nuesa visita al País de los Várdulos nun yera otru qu`asistir al pieslle de la so “popular” temporada del “txotx”, que vien a ser como la temporada de les espiches en versión euskalduna. Nun yera la primer vegada qu`asistía a esti tipu d`eventos na llocalidá d`Astigarraga, y cuido que nun va ser la cabera, porque la hospitalidá d`esti pueblu, nun solu l`astigartarra sinon el pueblu vascu en xeneral, sedría bastante pa facer tornar a estes tierres al más desixente de los visitantes, y si a eso sumamos la so profesionalidá y bon “savoir faire” culinariu entós pa que vos voi a cuntar.

Y curiau, que cuando falo de saber facer culinariu nun toi solamente refiriéndome, que también, a los lloreaos chefs vascos d`estrella Michelín, nin a la alta gastronomía d`aquelles tierres. Toi falando de la la esquisita cultura del “pintxo” donostiarra, o de les ancestrales parrilles de Guetaria onde s`asen selemente, pente brases d`encina estremeña, tiñosos, pixinos, rodabayos y besugos entá vivos que casique podrían saltar dende la cubierta de los pesqueros recién aportaos al muelle al platu del comensal… Y como non también toi falando de la austera calidá que mos ufierta el ya casi tradicional menú del toxtx de la comarca donostiarra. Dende mediados de xineru fasta finales d`abril, los llagares vascos ufren tolos fines de semana a los sos visitantes una envuelta y xugosa tortiella de bacaláu, siguía d`unos llombos de bacaláu con pimientos verdes fritos y rematáu con una esquisita “txuleta” de vaca asada al puntu, lo que equí llamaríamos un chuletón. Comu colofón d`esti menú; quesu Idiazabal con dulce de membrillu y un paxu de ñueces y como non sidre a pastu direutamente espichada “a la vasca” dende los toneles (kupelas dicen ellí).

Nesta peculiar ceremonia sidrera nun hay manteles, nin platos individuales, nin serviciu espurríu o cosa asemeyada... El serviciu faese en meses corries, onde unu, colos suyos, va compartir mesa con quien y-toque…Unes vegaes con pareyines de mozos euskaldunos, otres con prexubilaos cazurros asentaos en Hernani y que lleven na cartera una semeya de Franco y les más con grupos de franceses que se desplacen, autobús incorporáu, fasta Astigarraga a “despiporrase” cola aida de la sidra vasco.

Atrás quedó el “cuenterete” de que salir y comer en Guipuzcoa ye caro. Esta orxía de la sagardotegia, acompangada d`una sidra cada vuelta de mayor calidá (pese a quien pese), cuesta de media trenta euros por persona. Nel cascu antigüu de Donostia pues atopar un menú bien decente por entre dieciseyes y venti euros. Sentar les ñalgues y esfrutar del Bodegón Alejandro a escasos metros de la Plaza Mayor, (del grupu Martín Berasategui) cuesta 38’00 euros por persona, lo mesmo qu`una cena ramplona en cualquier restaurante uvieín de mediu pelu. Y güeyu!!...En Zarautz pues comer dende el menú del día en primera llinia de playa por menos de 10’00 euros a esfrutar de un menú degustación nel Karlos Arguiñano por 35’00 euros. Una vegada asimilada esta riestra d`exemplos la entruga nun pue ser otra que la que vien darréu …¿Ye caro comer n`Asturies?